原创沈嘉祿海上梦叠
咸鱼白粥，人生有味（上）
作者：沈嘉祿
沪语改写、讲述：边秦翌
指导：丁迪蒙
大热天，胃口差，上海人就想到了咸鱼。几条油里向煎过个小*鱼，配一碗温吞吞个白米粥，或者一碟咸鲞鱼肉饼子，再开两瓶冰啤酒，噢哟，一记头就有食欲了。夜快头，一家门勒勒一道，慢慢叫个吃吃，老底子上海弄堂里就是搿能介样子个。
讲到咸鱼，就想起了鲍鱼个典故。《孔子家语·六本》里向有一句闲话，叫做“如入鲍鱼之肆，久而不闻其臭。”有勿少人就想当然了，以为鲍鱼是老老臭个，其实搿个是误会啦。阿拉搿歇所讲个鲍鱼，勒勒古代叫做“鳆鱼”或者“石决明”，因为北方再有，所以搭南方个牡蛎同时称之为“南蛎北鳆”。伊个辰光，普通老百姓是勿可能吃到个，只有王侯之家再有一眼眼可能性。搿歇人工养殖成功，勒饭店里向随时可以吃到，价钿也勿大贵了。
而《孔子家语·六本》里向所讲个鲍鱼，是一种腌过之后呒没经过暴晒或者风干个咸鱼。想想看，勒勒农耕时代，呒没防腐剂，一个勿当心，咸鱼也会得坏脱发臭。孔老夫子讲过“十勿食”，其中“鱼馁而肉败，勿食”，搿个“馁”，就是鱼肉发臭个文绉绉个讲法。
又要讲故事了。大约摸公元前年，秦始皇带了交关人马一埭路里往南，到了会稽山下，领牢仔文武百官拜大禹，又立了石碑，再调头往北，到了平原津，就是搿歇个山东德州南，伊突然生毛病，结果勒勒沙丘，就是搿歇个河北平乡东，一脚去唻。秦始皇死个辰光正好是七月份，天气邪气热。秦始皇一直勒勒寻长生勿老个丹药，伊认为自家可以活到五百岁，万万呒没想到搿是伊最后一趟个出游。左丞相李斯考虑得蛮周到个，伊常怕皇帝死了半路浪向，天下要大乱个，就保密勿讲，绝大部分人侪勿晓得。秦始皇个尸体就摆勒一部通风个车子里向，一路浪还是老样子，旌旗飘飘，神抖抖个，就算是皇帝个吃喝拉撒也是正常传旨安排，继续北上。可惜啊，老天爷勿帮忙，介热个天气，皇帝个尸体也是要臭个呀，老快个，就有一股“馁”个味道传出来了。李丞相想办法，索性勒秦始皇个车子里向塞了交关鲍鱼，就是咸鱼啦，以搿只“馁”掩盖伊只“馁”，好勿容易回到咸阳，再正式发丧。
还有一个字：鲞。原来个意思是指暴腌之后再晒干个咸鱼，搿个字阿拉搿歇还是用个，意思也是一样个。譬如，*鱼鲞、鳗鲞、鳓鲞、墨鱼鲞咾啥。鲞搭仔鲍，对应两种咸鱼个样子，就是干搭仔湿。实际浪，咸鱼是邪气偶然个发明，渔民打到个鱼忒多了，一记头吃勿光，又呒没冰窖可以冷藏起来，交通搭仔贸易侪勿方便。后首来伊拉发现用盐来腌一腌，放个辰光就可以长一眼，乃么咸鱼就出现了呀，而且味道邪气好唻。还有一种咸鱼，就是勒勒用盐腌个辰光，同时再加眼老酒或者酒糟，味道更加丰富，称之为鲊。东晋大将*陶侃勒勒年轻个辰光做过鱼梁县吏，有一趟，伊拿了一钵斗鱼鲊派人送拨老姆妈。伊姆妈动也呒没动，马上封了钵斗，还写了一封信教训儿子：侬作为官吏，居然拿公家个物事拨我吃用，搿对我呒没任何好处，反而让我邪气担心。搿就是有名个“陶母封鲊”，摆了今朝，真个是廉*建设个好教材。
作者：沈嘉祿讲述者：边秦翌原标题：《咸鱼白粥，人生有味（上）》